Gujarat Breaking News Live: ગુજરાત સહિત દેશ અને દુનિયામાં બનતી તમામ મહત્વની ઘટનાઓ, રાજકારણ, હવામાન, અકસ્માત, રમતગમત, બિઝનેસ, મનોરંજન સહિતના દરેક મોટા સમાચારની પળેપળની લાઈવ અપડેટ અને બ્રેકિંગ ન્યૂઝ એક જ જગ્યાએ મેળવવા માટે Zee 24 Kalak સાથે જોડાયેલા રહો...
લાંબા સમય બાદ પોરબંદર જિલ્લામાં ફરી એક વખત વરસાદનું આગમન થયું છે. જિલ્લાના ગ્રામ્ય વિસ્તારોમાં ધીમીધારે વરસાદ શરૂ થયો છે. બગવદર, અડવાણા, ભેટકડી, ભોમીયાવદર અને મજીવાણા સહિતના ગામોમાં વરસાદ વરસ્યો છે. પોરબંદર, દેવભૂમિ દ્રારકા અને જામનગર જિલ્લામાં આ વર્ષે વરસાદ નહિવત છે.
બનાસકાંઠા વધુ એક અકસ્માતની ઘટના સામે આવી છે. ઓગડના તેરવાડા રોડ પર નશતપુરાના પાટિયા પાસે બાઇક અને ગાડી વચ્ચે ગમખ્વાર અકસ્માત સર્જાયો હતો. અકસ્માતમાં બે લોકોના ઘટના સ્થળે મોત નિપજ્યા હતા, તો એક વ્યક્તિ ગંભીર રીતે ઇજાગ્રસ્ત થતાં સારવાર અર્થે ધારપુર મેડિકલ કોલેજ ખસેડાયો છે. બાઈક પર સવાર 22 વર્ષીય ચંદ્રિકાબેન રઘુજી ઠાકોર અને ગાડી ચાલક 35 વર્ષીય દિલીપ પોપટજી સંબોસાનાનું મોત નીપજ્યું છે. તો બાઈક ચાલક જયદીપ ધીરાજી ઠાકોરને ગંભીર ઇજાઓ પહોંચી હતી. અકસ્માતને લઈને થરા પોલીસે વધુ તપાસ હાથ ધરી છે.
રાજ્યના પૂર્વ કૃષિ મંત્રી રાઘવજી પટેલ અને જોડિયા તાલુકા પંચાયતના પ્રમુખના પતિનું કોલ રેકોર્ડિંગ વાયરલ થયું છે. બારાડી હડિયાણા ગામ પાસે ચેક ડેમના ખાતમુહૂર્ત પત્રિકામાં તાલુકા પ્રમુખના નામ ના લખતા પ્રમુખના પતિ ભડક્યા હતા. પ્રમુખના પતિ મયુર ચનીયારાએ પૂર્વ કૃષિ મંત્રી રાઘવજી પટેલને કોલ કરી નામ ના લખવાનું કારણ માંગ્યું હતું. પ્રમુખના પતિ મયુર ચનીયારાએ રાઘવજી પટેલ કોંગ્રેસના કાર્યકર્તાને આગળ કરતા હોવાનો આક્ષેપ કર્યો છે. ભાજપના જુના કાર્યકરોને અવગણા કરતા હોવાના આક્ષેપ થતાં ભાજપમાં અંદરખાને ચાલતી લડાઈ બહાર આવી છે. કથિત કોલ રેકોર્ડિંગ સામે આવતા બંને નેતા સામે અનેક સવાલ ઉઠ્યા છે.
અમદાવાદમાં 'GenZatri' ગરબા આયોજનને લઈને વિવાદ સર્જાયો છે. ગુજરાત યુનિવર્સિટી કન્વેન્શન સેન્ટરમાં યોજાયેલા ગરબાનો વીડિયો વાયરલ થયો છે. માતાજીના ગરબાને બદલે બોલિવૂડ ગીતો વાગતાં ચર્ચા શરૂ થઈ છે. ગરબામાં 'અભી તો પાર્ટી શુરુ હુઈ હૈ' જેવા ગીતો વાગતાં વિવાદ સર્જાઓ છે. ચાલુ ગરબા દરમિયાન સિંગરે સ્ટેજ પર શર્ટ ઉતાર્યાનો દાવો કરવામાં આવી રહ્યો છે. દિલ્હીના 'અતરંગી બેન્ડ'ના સિંગરે ગંજી પહેરી ઠુમકા લગાવ્યા હતા. ગરબાના ઓનલાઇન પાસની કિંમત રૂ.1,500 સુધી હોવાનો દાવો કરવામાં આવી રહ્યો છે. ત્યારે સમગ્ર મામલે ગરબાની પરંપરા અને આયોજનને લઈને સવાલો ઉભા થયા છે.
