સોશિયલ મીડિયાની કાળી બાજુ: મિત્રતાના નામે મુંબઈની હોટેલમાં યુવતી પર દુષ્કર્મ, વડોદરાના યુવાનની કરતૂતથી હાહાકાર

જેના પર આંખો બંધ કરીને વિશ્વાસ કર્યો, એ જ દોસ્ત આખરે હેવાન નીકળ્યો...વડોદરાની પ્રખ્યાત એમ. એસ. યુનિવર્સિટીમાં અભ્યાસ કરતો સફાન શેખ તેના ચાર મિત્રો સાથે મુંબઈમાં નશાની મહેફિલ માણવા પહોંચ્યો હતો...આ પાર્ટીમાં વડોદરાની કોલેજિયન યુવતીને પણ બોલાવવામાં આવી હતી...યુવતીને અંદાજો પણ નહોતો કે જે મિત્ર પર તે ગર્વ કરતી હતી, તે જ તેને હવસનો શિકાર બનાવવાનું ષડયંત્ર રચી રહ્યો છે...

મુંબઈની હોટેલમાં પાર્ટી દરમિયાન યુવતીને કોલ્ડ્રિંક્સ કે કેફી પીણું પીવડાવી બેભાન કરી દેવામાં આવી. યુવતી અર્ધબેભાન અવસ્થામાં હતી અને નરાધમોએ તેની મજબૂરીનો ફાયદો ઉઠાવી દુષ્કર્મ ગુજાર્યું...આટલું જ નહીં, આ પાપ છુપાવવા માટે નરાધમોએ પીડિતાને ગાડીમાં બેસાડી ગુજરાત તરફ ભાગવાનું શરૂ કર્યું.

પોલીસ તપાસમાં ચોંકાવનારો ખુલાસો થયો છે કે પીડિત યુવતી મુખ્ય આરોપી સફાન શેખના સંપર્કમાં સોશિયલ મીડિયા દ્વારા આવી હતી...ઈન્સ્ટાગ્રામ કે ફેસબુક પર શરૂ થયેલી સામાન્ય હાય-હેલ્લો આખરે જિંદગીની સૌથી મોટી બરબાદી સાબિત થઈ.

આ પણ વાંચોઃ 4 લાખ રૂપિયા લેવાનો દાવો અને વિવાદમાં ફસાયા જીગ્નેશ મેવાણી! તમે પણ જાણો શું છે સમગ્ર મામલો

પાપ ગમે એટલું છુપાવો, પણ બહાર આવી જ જાય છે...મુંબઈથી ગુજરાત આવતી વખતે વાપીના ડુંગરા નજીક યુવતીની તબિયત અચાનક લથડી...આરોપીઓ ગભરાઈને તેને વાપીની હોસ્પિટલ લઈ ગયા, જ્યાં ડોક્ટરોને શંકા જતાં તાત્કાલિક ડુંગરા પોલીસને જાણ કરી. પોલીસે એક્શનમાં આવીને મુખ્ય આરોપી સફાન ઝફર શેખ અને ફરીદ કોઠીયાવાલાને દબોચી લીધા છે...જ્યારે સલમાન, વસીમ અને ફૈઝાન મુલતાની હજુ પણ ફરાર છે...કોર્ટે પકડાયેલા નરાધમોના રિમાન્ડ મંજૂર કર્યા છે અને પોલીસ હવે તમામના મેડિકલ ટેસ્ટ કરાવી કાયદાનો ગાળિયો મજબૂત કરી રહી છે.

આજના હાઈ-ફાઈ જમાનામાં રીલ્સ અને લાઈક્સના ચક્કરમાં યુવાનો કેવી રીતે નશા અને ગુનાખોરીના રસ્તે ચડી રહ્યા છે, આ કિસ્સો તેનો જીવતો જાગતો પુરાવો છે..

ભણેલા-ગણેલા યુવાનોનું આ કૃત્ય સમાજ માટે લાલબત્તી સમાન છે. સોશિયલ મીડિયાના મિત્રો રિયલમાં કેટલા ખતરનાક હોઈ શકે છે તે વાપી પોલીસે ખુલ્લું પાડ્યું છે. હવે જોવાનું એ રહેશે કે ફરાર ત્રણ નરાધમો ક્યારે પોલીસના સકંજામાં આવે છે.