ઘરની આંગણે પણ અસુરક્ષા: ગાઢ નિંદ્રામાં પોઢેલા પરિવારને ખબર પણ ન રહી, બહાર વૃદ્ધા પર ઘાતકી હુમલો કરી લૂંટારૂઓ પલાયન

વાપીના ડુંગરા ફળિયા વિસ્તારના કોળીવાડમાં બનેલી ઘટનાએ વલસાડ જિલ્લાને ધ્રુજાવી દીધો છે. વહેલી સવારે પરિવારના તમામ સભ્યો ઘરની અંદર મીઠી નિંદ્રા માણી રહ્યા હતા, ત્યારે ઘરની બહાર એક એવો ભયાનક ખેલ રમાઈ રહ્યો હતો જેની કલ્પના પણ પરિવારે કરી નહોતી. 75 વર્ષીય નાની બહેન પટેલ ઘરની બહાર બેઠા હતા અને એ જ સમયે કાળ બનીને બે લૂંટારુઓ ત્રાટક્યા.

• વાપીમાં વૃદ્ધા પર ખૂની હુમલો
• 7 તોલાથી વધુ સોનાની લૂંટ
• મોઢામાં ડૂચો મારી લૂંટ ચલાવી
• વૃદ્ધાને કીચડમાં ફેંકી ફરાર
• બે અજાણ્યા લૂંટારૂઓની શોધ તેજ

આતંકીઓની જેમ ત્રાટકેલા બે શખ્સોએ સૌથી પહેલા આ વૃદ્ધાને દબોચી લીધી. લૂંટારુઓ સારી રીતે જાણતા હતા કે જો માજી બૂમાબૂમ કરશે તો ઘરમાં સૂતેલો પરિવાર જાગી જશે. એટલે ક્રૂરતાની તમામ હદો વટાવીને આરોપીઓએ વૃદ્ધાના મોઢામાં કપડાનો ડૂચો મારી દીધો. અવાજ દબાવી દીધા બાદ લૂંટારુઓએ વૃદ્ધા પર જાનલેવા હુમલો શરૂ કર્યો.

વાડાના કીચડમાં ફેંકીને પલકારામાં ગાયબ 

લૂંટારુઓએ વૃદ્ધાને જાનથી મારી નાખવાની ધમકી આપી અને કાન-ગળાના ભાગે ગંભીર ઈજાઓ પહોંચાડી. પીડાથી કણસતા વૃદ્ધાના 7 તોલાથી વધુ સોનાના દાગીના જબરદસ્તી આંચકી લેવાયા. પાપીઓ એટલેથી ન અટક્યા, પુરાવાનો નાશ કરવા અને વૃદ્ધા કોઈને તાત્કાલિક કહી ન શકે તે માટે તેમને ઘરની પાછળ આવેલા વાડાના કીચડમાં ફેંકીને પલકારામાં ગાયબ થઈ ગયા. સવારે જ્યારે પરિવારે ઘરના મોભીની આ દશા જોઈ ત્યારે તેમના પગ નીચેથી જમીન સરકી ગઈ.

લૂંટ પાછળ કોઈ ચોક્કસ 'જાણભેદુ' હોઈ શકે છે

આ ચકચારી લૂંટની ઘટના વાયુવેગે પ્રસરતા ડુંગરા પોલીસનો મોટો કાફલો ઘટનાસ્થળે દોડી આવ્યો હતો. પોલીસે પીડિત વૃદ્ધાના નિવેદનના આધારે ગુનો નોંધી તપાસનો ધમધમાટ શરૂ કર્યો છે. આસપાસના સીસીટીવી ફૂટેજ તપાસવામાં આવી રહ્યા છે. પોલીસને આશંકા છે કે આ લૂંટ પાછળ કોઈ ચોક્કસ 'જાણભેદુ' હોઈ શકે છે, જેણે અગાઉ ઘરની રેકી કરી હતી. હાલ તો પોલીસે અલગ-અલગ દિશામાં ટીમો દોડાવી બંને જલ્લાદોને ઝડપી પાડવા ચક્રો ગતિમાન કર્યા છે.

શું લૂંટારુઓ આટલા બેખોફ બની ગયા 

વાપીમાં બનેલી આ ઘટના લાલબત્તી સમાન છે. 75 વર્ષના માજીની આપવીતી સાંભળીને કાળજું કંપી જાય છે. સવાલ એ થાય છે કે શું લૂંટારુઓ આટલા બેખોફ બની ગયા છે કે વૃદ્ધો પર હુમલો કરતા પણ તેમની આત્મા નથી કાંપતી?. પોલીસ હવે સીસીટીવી અને કડીઓ જોડીને આ 'જાણભેદુ' લૂંટારુઓ સુધી પહોંચવા રાત-દિવસ એક કરી રહી છે પણ જ્યાં સુધી આ જલ્લાદો જેલના સળિયા પાછળ નહીં ધકેલાય, ત્યાં સુધી કોળીવાડના રહીશોમાં ભયનો સન્નાટો યથાવત રહેશે.