Gujarat Breaking News Live: ગુજરાત સહિત દેશ અને દુનિયામાં બનતી તમામ મહત્વની ઘટનાઓ, રાજકારણ, હવામાન, અકસ્માત, રમતગમત, બિઝનેસ, મનોરંજન સહિતના દરેક મોટા સમાચારની પળેપળની લાઈવ અપડેટ અને બ્રેકિંગ ન્યૂઝ એક જ જગ્યાએ મેળવવા માટે જોડાયેલા રહો Zee 24 Kalakના લાઈવ બ્લોગ સાથે...
સ્ટેચ્યુ ઓફ યુનિટી ખાતે PM મોદીની ઉપસ્થિતિમાં રાષ્ટ્રીય એકતા દિવસની ઉજવણી કરવામાં આવી રહી છે. સુરક્ષા જવાનો દ્વારા એકતા પરેડ યોજી સરદાર પટેલની પ્રતિમાને ગાર્ડ ઓફ ઓનર આપવામાં આવ્યું. મોટી સંખ્યામાં લોકો ઉપસ્થિત રહ્યા. ત્યાં ઉપસ્થિત તમામને PM મોદીએ એકતાના શપથ લેવડાવ્યા હતા.
પ્રધાનમંત્રી નરેન્દ્ર મોદી એકતાનગરના પ્રવાસે છે. થોડીવારમાં રાષ્ટ્રીય એકતા પરેડ યોજાશે. પ્રધાનમંત્રી મોદી આ એકતા પરેડમાં હાજરી આપશે. સ્ટેચ્યુ ઓફ યુનિટી ખાતે સુરક્ષા દળોની પરેડ યોજાશે. સુરક્ષા જવાનો સરદાર પટેલ પ્રતિમાને ગાર્ડ ઓફ ઓનર આપશે.
દ્વારકાના ભાણવડના ચોખંડા ગામમાં કરા સાથે વરસાદ પડતા ખેડૂતોની મુશ્કેલીમાં વધારો થયો છે. તો કલ્યાણપુર તાલુકાના રાજપરા ગામે પણ ધોધમાર વરસાદ પડ્યો છે. જેના કારણે ખેતરોમાં રહેલા પાકને નુકશાન થવાની ભીતિ સેવાઈ રહી છે. ગ્રામ્ય વિસ્તારમાં ધોધમાર વરસાદના કારણે ખેડૂતો મુશ્કેલીમાં મુકાયા છે.
દેશનો સૌથી મોટો રેલવે હોલ્ડિંગ એરિયા ઉધના રેલવે સ્ટેશન પર બનાવવામાં આવ્યો છે. 10,000 સ્ક્વેર મીટરમાં આ હોલ્ડિંગ એરિયા બનાવવામાં આવ્યો છે. એક જ સમયે 15,000 જેટલા યાત્રીઓ ઊભા રહી શકે તે રીતની વ્યવસ્થા કરવામાં આવી છે. 51 જેટલા સીસીટીવી કેમેરા લગાવવામાં આવ્યા છે. હોલ્ડિંગ એરિયામાં કંટ્રોલરૂમ પણ ઊભો કરવામાં આવ્યો છે. 10 જેટલી ટિકિટ વિન્ડો ઓપન કરવામાં આવી છે. એરપોર્ટ પર જેવી સુવિધા હોય એવી સુવિધા મુસાફરોને મળી રહેશે. સ્વચ્છ ટોયલેટ બાથરૂમ સહિતની સુવિધાઓ મુસાફરોને મળી રહેશે.
કચ્છના લખપત નજીક ભૂકંપનો આંચકો અનુભવાયો છે. રિક્ટર સ્કેલ પર 3.1ની તીવ્રતાનો ભૂકંપ નોંધાયો છે. લખપતથી 53 કિલોમીટર ઉત્તર ઉત્તર-પૂર્વ દિશામાં ભૂકંપનું કેન્દ્રબિંદુ નોંધાયું હતું. 31 ઓક્ટોબરના બપોરે 3 વાગ્યાને 31 મિનિટે ભૂકંપનો આંચકો અનુભવાયો હતો.
