અંબાજીનો ભાદરવી પૂનમ મહામેળો સંપન્ન: 42 લાખથી વધુ ભક્તોએ ટેકવ્યું શીશ, 3 કરોડથી વધુનું દાન!
Ambaji Maha Mela : આસ્થા, શ્રદ્ધા અને સમર્પણનો સાક્ષી બનેલો અંબાજીનો ભાદરવી પૂનમ મહામેળો હવે પૂર્ણ થયો છે. છ દિવસ સુધી ચાલેલા આ મહામેળામાં 42 લાખથી વધુ ભક્તોએ મા અંબાના ચરણોમાં શીશ નમાવી ધન્યતાની અનુભૂતિ કરી. ભક્તિના અનોખા રંગ, સુરક્ષાની શ્રેષ્ઠ વ્યવસ્થા અને સેવાની ભાવનાએ આ મેળાને યાદગાર બનાવી દીધો જુઓ આ ખાસ અહેવાલ.
Bhadravi Poonam : કોઈ મહેસાણાથી... કોઈ અમદાવાદથી... તો કોઈ રાજકોટથી પગપાળા ચાલીને માના દર્શન માટે પહોંચ્યું. કોઈએ દંડવત યાત્રા કરી તો કોઈએ ભક્તિના જયઘોષ સાથે રાજમાર્ગોને માતાજીના નામથી ગુંજાવી દીધા. અંબાજી તરફ જતા દરેક માર્ગ પર માત્ર એક જ લાગણી દેખાઈ...જય અંબે...
મહામેળાના અંતિમ દિવસે રાજ્યના નાયબ મુખ્યમંત્રી હર્ષ સંઘવી પણ અંબાજી પહોંચ્યા. માતાજીના ચાચર ચોકમાં હાથમાં ધજા લઈને ભક્તિભાવથી ગરબે રમ્યા અને મંદિરના શિખર પર ધજા અર્પણ કરી સુરક્ષા કર્મીઓની નિષ્ઠાભરી સેવાને બિરદાવી.
પૂનમના દિવસે જ પોણા ચાર લાખથી વધુ ભક્તોએ દર્શન કર્યા. લાખો લોકોની હાજરી છતાં સમગ્ર મેળો શાંતિપૂર્ણ રહ્યો. પોલીસ વિભાગે તેરા તુજકો અર્પણ કાર્યક્રમ હેઠળ ગુમ થયેલા મોબાઈલ, પાકિટ અને કિંમતી વસ્તુઓ તેમના માલિકોને પરત આપી માનવતાની અનોખી મિસાલ રજૂ કરી. ઉત્કૃષ્ટ કામગીરી બદલ પોલીસ અધિકારીઓનું સન્માન પણ કરવામાં આવ્યું.
ભક્તોએ માતાજીની દાનપેટીઓ પણ છલકાવી દીધી. અંદાજે ત્રણ કરોડ રૂપિયાથી વધુનું દાન પ્રાપ્ત થયું. વહીવટદાર કૌશિક મોદીના જણાવ્યા મુજબ છ દિવસમાં 29 લાખથી વધુ પ્રસાદ પેકેટનું વિતરણ થયું અને ચાર હજાર જેટલી નાની-મોટી ધજાઓ માતાજીના શિખર પર અર્પણ થઈ.
- છ દિવસમાં 29 લાખથી વધુ પ્રસાદ પેકેટનું વિતરણ
- 4 હજાર જેટલી ધજાઓ માતાજીના શિખર પર અર્પણ થઈ
ભક્તિના અવિસ્મરણીય દ્રશ્યો... સેવાની સુગંધ... અને લાખો હૃદયોમાં માતાજી પ્રત્યે અતૂટ વિશ્વાસ. ભાદરવી પૂનમનો મહામેળો પૂર્ણ થયો છે, પરંતુ મા અંબાના આશીર્વાદની આ અનુભૂતિ ભક્તોના હૃદયમાં વર્ષભર જીવંત રહેશે....જય અંબે...
