'હનુમાનજીએ બચાવ્યા...', કેપ્ટન મચ્છરે PM મોદીને ફોન કોલ પર જણાવી અંદરની હકીકત, હુમલા સમયે કેવી રીતે મળી હિંમત

PM Narendra Modi: ગુજરાતી મૂળના કેપ્ટન સ્મિત મચ્છાર દુબઈથી તેલ અવીવ જઈ રહેલી ફ્લાયદુબઈની FZ1073 ફ્લાઈટ ઉડાડી રહ્યા હતા. ઉડાન દરમિયાન તેમના કો-પાયલટે કથિત રીતે વિમાનને ક્રેશ કરાવવાનો પ્રયાસ કર્યો હતો. આ દરમિયાન વિમાન પોતાની ક્રૂઝિંગ ઊંચાઈ પરથી અચાનક હજારો ફૂટ નીચે આવી ગયું અને કૉકપિટમાં બંને પાયલટો વચ્ચે હિંસક ઝઘડો થયો.

પ્રધાનમંત્રી મોદીએ આજે વીડિયો કોલ કરીને કેપ્ટન સ્મિત મચ્છર સાથે વાત કરી હતી અને તેની હિંમત, સૂઝબૂઝ અને સંયમની પ્રશંસા કરી હતી. પીએમ મોદીએ કેપ્ટનની હિંમત વધારતા જણાવ્યું હતું કે આખો દેશ તમારા માટે પ્રાર્થના કરી રહ્યો છે. કોલ દરમિયાન કેપ્ટન સ્મિત મચ્છર ભાવુક થઈ હયો અને જણાવ્યું હતું કે પ્રધાનમંત્રી મોદી સાથે વાત કરવી તેમના માટે એક ખાસ ક્ષણ છે અને તેમણે પોતાનો સૌથી મોટા આદર્શ ગણાવ્યા. જ્યારે કેપ્ટન સાથે વાત કરતા પીએમ મોદીએ જણાવ્યું હતું કે દેશ હવે ગર્વથી કહી શકે છે કે ભારતીય એ નથી, જે બીજાનો જીવ લે છે, પરંતુ તે છે જે બીજાનો જીવ બચાવવા માટે પોતાનો જીવ પણ જોખમમાં નાંખવા માટે તૈયાર થઈ જાય છે.

પ્રધાનમંત્રી મોદીએ સ્મિતને માતાની વાત કરી
પીએમ મોદીએ સ્મિત મચ્છરની માતા ગીતા બેન વિશે પણ વાત કરી અને જણાવ્યું હતું કે તેમના ઉછેરના ભરપૂર વખાણ કર્યા હતા. તેમણે જણાવ્યું કે ગીતાબેને સ્મિતને ભગવદ્ ગીતાના શ્રેષ્ઠ મૂલ્યો અને શિક્ષણ સાથે ઉછેર્યો છે. કેપ્ટન સ્મિતે આ ક્ષણને પોતાના માટે ખૂબ જ ગર્વ ગણાવતા કહ્યું કે, તેમણે ક્યારેય પીએમ મોદી સાથે વાત કરવાનો મોકો મળશે એવું વિચાર્યું નહોતું. આવી વિકટ અને મુશ્કેલ પરિસ્થિતિમાં હિંમત આપવા બદલ તેમણે હનુમાન ચાલીસાનો આભાર માન્યો હતો, અને ઉમેર્યું કે જો તેઓ યોગ્ય સમયે કોકપિટ ન ખોલી શક્યા હોત તો સહ-પાયલટના હુમલા વચ્ચે પરિસ્થિતિ અત્યંત ગંભીર બની શકી હોત.

લોહીલુહાણ હોવા, છતાં હિંમત ના હારી
આ હુમલામાં ગુજરાતી મૂળના કેપ્ટન સ્મિત ગંભીર રીતે ઘાયલ થઈ ગયા, પરંતુ તેમણે હિંમત હારી નહોતી. લોહીલુહાણ હાલતમાં હોવા છતાં તેમણે કૉકપિટનો દરવાજો ખોલવાનો પ્રયાસ કર્યો, જે બાદ આગળ બેઠેલા મુસાફરો અને ક્રૂ મેમ્બર્સે કૉકપિટમાં પહોંચીને હુમલાખોર પાયલટ પર કાબૂ મેળવ્યો હતો. ફ્લાઈટમાં હાજર બે ઓફ-ડ્યુટી ફ્લાયદુબઈ પાયલટ પણ કૉકપિટમાં પહોંચ્યા અને વિમાનને સંભાળ્યું હતું. આ પછી વિમાનને સાઉદી અરેબિયાના તબૂક ડાયવર્ટ કરવામાં આવ્યું અને સુરક્ષિત લેન્ડિંગ કરાવવામાં આવ્યું.

કેપ્ટન સ્મિતે 9/11 જેવી તારાજી રોકી - PM મોદી
ઘટના બાદ કેપ્ટન સ્મિતની બહાદુરીની વડાપ્રધાન નરેન્દ્ર મોદી, રાષ્ટ્રપતિ ડોનાલ્ડ ટ્રમ્પ અને ઈઝરાયેલના વડાપ્રધાન બેન્જામિન નેતન્યાહૂ સહિત અનેક લોકોએ પ્રશંસા કરી. પીએમ મોદીએ કહ્યું કે કેપ્ટન સ્મિતે પોતાના જીવની પરવા કર્યા વગર બહાદુરી દર્શાવી અને સંભવિત 9/11 જેવી તારાજી રોકવામાં મહત્વની ભૂમિકા ભજવી. ગુજરાત સરકારે પણ તેમને 'વિશિષ્ટ ગુજરાત ગરિમા પુરસ્કાર'થી સન્માનિત કરવાની જાહેરાત કરી છે.