વાંકાનેરમાં પ્રેમ પ્રકરણ બન્યું ઘાતક: દીકરી ભાગી છૂટી ને પિતાના ગુસ્સાએ લીધો નિર્દોષ દાદાનો ભોગ
Wankaner Khanpar Murder : પ્રેમ અંધ હોય છે એવું આપણે વારંવાર સાંભળતા આવ્યા છીએ, પરંતુ જ્યારે આ પ્રેમમાં લોહીના ફુવારા ઊડે અને કોઈ નિર્દોષનો જીવ જાય, ત્યારે કાયદો અને વ્યવસ્થા સામે પણ સવાલો ઊભા થાય છે. મોરબીના વાંકાનેર તાલુકાના ખાનપર ગામમાં એક આવો જ કાળજું કંપાવી દેનારો કિસ્સો સામે આવ્યો છે. શું બની ઘટના અને કેમ એક નિર્દોષને જીવ ગુમાવવાનો વારો આવ્યો?.
હિમાંશુ ભટ્ટ, મોરબી / મોરબીના વાંકાનેર તાલુકાનું આ નાનકડું ખાનપર ગામ. જ્યાં અત્યારે સન્નાટો છે, ભય છે અને પોલીસનો ચુસ્ત બંદોબસ્ત છે. કારણ કે, આ ગામમાં પ્રેમની આડમાં રમાયો છે લોહિયાળ ખેલ! ગામમાં રહેતા સુરેશભાઈ સરવૈયાની દીકરી હેતલને ગામનો જ કિશન મકવાણા નામનો યુવક ભગાડી ગયો હતો.
- પ્રેમ પ્રકરણનો લોહિયાળ અંજામ!
- દીકરીની શોધમાં ગયેલા દાદાની હત્યા
- પ્રેમમાં અંધ પુત્ર...
- પિતાએ ખેલ્યો લોહિયાળ ખેલ!
દીકરીના ગુમ થવાથી ચિંતિત દાદા સગરામભાઈ સામતભાઈ સરવૈયા અને કાકા હેમુભાઈ સહિતનો પરિવાર યુવકના ઘરે માત્ર એટલું પૂછવા ગયા હતા કે,'અમારી દીકરી ક્યાં છે'? પણ યુવકના પિતા દેવાભાઈ મકવાણા અને તેના સાગરીતો જાણે લોહી પીવા જ તરસતા હતા!.
લોહીલુહાણ હાલતમાં જમીન પર ઢળી પડ્યા
વાતચીત શરૂ થાય તે પહેલા જ દેવાભાઈ મકવાણા સહિત 8 શખ્સોએ ગાળોનો વરસાદ વરસાવ્યો અને હાથમાં લાકડાના જાડા ધોકા લઈને તૂટી પડ્યા. આ હિચકારા હુમલામાં દેવાભાઈએ હેતલના દાદા સગરામભાઈના માથાના ભાગે કાળમુખો ધોકો ફટકારી દીધો! વૃદ્ધ દાદા લોહીલુહાણ હાલતમાં જમીન પર ઢળી પડ્યા. તેમને તાત્કાલિક રાજકોટ સિવિલ હોસ્પિટલ ખસેડાયા, પણ કુદરતને કંઈક બીજું જ મંજૂર હતું. સારવાર દરમિયાન દાદાએ દમ તોડી દીધો અને આખોય મામલો કલમ 302 એટલે કે હત્યામાં પલટાઈ ગયો!.
- પ્રેમ પ્રકરણનો લોહિયાળ અંજામ...
- દીકરીની શોધમાં ગયા દાદા
- દાદાને જીવ ગુમાવવાનો આવ્યો વારો
- પ્રેમમાં અંધ પુત્ર, પિતાએ ખેલ્યો ખૂની ખેલ
- 8 આરોપીઓ પોલીસ સકંજામાં
હત્યાના આ ચકચારી બનાવ બાદ વાંકાનેર તાલુકા પોલીસ એક્શન મોડમાં આવી ગઈ. મૃતકના દીકરા હેમુભાઈ સરવૈયાની ફરિયાદના આધારે પોલીસે તાબડતોબ કાર્યવાહી કરી. દીકરીના દાદાની હત્યા કરનારા મુખ્ય સૂત્રધાર દેવાભાઈ ઉકાભાઈ મકવાણા, કિરણ મકવાણા, વિપુલ મકવાણા, રાજુ, મનસુખ, ભરત, વિરમ અને જેમાભાઈ મકવાણા. આ તમામ 8 નરાધમોને પોલીસે ગણતરીના કલાકોમાં દબોચીને લોકઅપની હવા ખાતા કરી દીધા છે.
પુત્રના પ્રેમની સજા પિતા ભોગવશે
જો કે, આ મામલો અહીં જ નથી અટક્યો. હુમલો કરનાર યુવકના પિતાએ પણ સામે પક્ષે એટલે કે દીકરીના પિતા સહિત 8 લોકો સામે વાંકાનેર તાલુકા પોલીસ મથકે વળતી ફરિયાદ નોંધાવી છે. હાલમાં ખાનપર ગામમાં કોઈ મોટી આફત કે અનિચ્છનીય ઘટના ન બળે તે માટે પોલીસે ચુસ્ત પોલીસ છાવણી ખડકી દીધી છે પણ સવાલ એ છે કે, પુત્રના પ્રેમની સજા પિતાએ કેમ ભોગવવી પડી અને દીકરીના દાદાએ પોતાનો જીવ કેમ ગુમાવવો પડ્યો?
એક તરફ દીકરી ગુમ છે, બીજી તરફ ઘરના મોભી એવા દાદાની છત્રછાયા ગુમાવી ચૂકેલો સરવૈયા પરિવાર ન્યાયની ભીખ માંગી રહ્યો છે. જ્યારે ગામ આખું આ લોહિયાળ પ્રેમ પ્રકરણના અંજામથી સ્તબ્ધ છે. હવે જોવાનું એ રહેશે કે ખાખી આ તમામ આઠેય હત્યારાઓને કોર્ટમાંથી કેવી કડક સજા અપાવે છે.
