10 વર્ષ પહેલાં જ ગુજરાતમાં કોંગ્રેસની સરકાર હોત જો આ નેતા ન નડ્યા હોત!, ૨૦૧૭ની હાર પર ભાજપના નેતાનો મોટો ખુલાસો

Gujarat politics : 2017ની ચૂંટણીએ સાબિત કર્યું કે ગુજરાતમાં વિપક્ષ પણ મજબૂત લડત આપી શકે છે અને આનાથી ભાજપે પોતાની રણનીતિમાં મોટા ફેરફારો કરવાની ફરજ પડી હતી. પીએમ મોદી અને અમિત શાહની રણનીતિ છતાં ગુજરાતમાં ભાજપ માટે સૌથી મોટી કોઈ ટફ ચૂંટણી રહી હોય તો એ 2017ની વિધાનસભાની ચૂંટણી હતી. કોંગ્રેસને પણ ગુજરાતમાં સરકાર બદલી કાઢીશું એવો પૂરો વિશ્વાસ હોવાથી રાહુલ ગાંધી ખુદ મેદાને હતા. જેઓએ ગુજરાતમાં ધામા નાખ્યા હતા અને એનું રિઝલ્ટ પણ સામે જ હતું. 

ભલે કોંગ્રેસની સરકાર ના બની પણ બહુમતનો આંકડો ઘટીને બે આંકડાઓમાં આવી ગયો હતો. ભાજપ ગુજરાતની 182 સીટોમાંથી માત્ર 99 પર સમેટાઈ ગઈ હતી. રાજ્યમાં ભાજપની સરકાર બાદ આ સૌથી નીચો બહુમતનો આંક છે. એ સમયે ગુજરાતમાં કોંગ્રેસને 77 બેઠકો મળી હતી. અપક્ષને પણ 6 બેઠકો મળી હતી જેમાં યુવા નેતાઓ પણ હતા.

પાટીદાર વસ્તીવાળા વિસ્તારોમાં ભાજપ વિરોધી લહેર જોવા મળી હતી

હાર્દિક પટેલના નેતૃત્વમાં પાટીદાર અનામત આંદોલન પરાકાષ્ઠા પર હતું. ખાસ કરીને સૌરાષ્ટ્ર અને સુરતના પાટીદાર વસ્તીવાળા વિસ્તારોમાં ભાજપ વિરોધી લહેર જોવા મળી હતી, જેની સીધી અસર ચૂંટણી પરિણામો પર પડી. આ ચૂંટણીમાં પાટીદાર આંદોલનમાંથી હાર્દિક પટેલ, ઓબીસી નેતા તરીકે અલ્પેશ ઠાકોર અને દલિત અધિકાર મંચમાંથી જિગ્નેશ મેવાણી જેવા યુવા ચહેરાઓ મુખ્ય પ્રવાહના રાજકારણમાં આવ્યા. કોંગ્રેસે આ ત્રણેય યુવાનો સાથે અદ્યતન રણનીતિના ભાગરૂપે ગઠબંધન કે સમર્થન મેળવ્યું હતું.

હાલમાં આ નેતાઓ પૈકી જિગ્નેશ મેવાણી સિવાયના અલ્પેશ ઠાકોર અને હાર્દિક પટેલ ભાજપમાં જોડાઈ ગયા છે. જેઓ આંદોલનકારી અને બોલકા નેતાઓ હતા હવે ભાજપમાં જોડાઈને શિસ્તમાં આવી ગયા છે.

આ ચૂંટણી ભાજપ માટે લિટમસ ટેસ્ટ સમાન હતી

2017ની ચૂંટણીમાં સૌરાષ્ટ્રમાં ખેડૂતોના મોટા પ્રશ્નો હતા. કપાસ-મગફળીના ભાવ અને પાટીદાર રોષના કારણે સૌરાષ્ટ્ર-કચ્છના પટ્ટામાં ભાજપને મોટું નુકસાન થયું હતું. કોંગ્રેસે અહીં અપેક્ષા કરતાં ઘણું સારું પ્રદર્શન કર્યું હતું. ગ્રામીણ અને આદિવાસી પટ્ટામાં કોંગ્રેસે મજબૂતી બતાવી, પરંતુ અમદાવાદ, સુરત, વડોદરા જેવા મોટા શહેરો અને અર્બન વિસ્તારોમાં મતદારોએ ભાજપ પર ભરોસો જાળવી રાખ્યો, જેના કારણે ભાજપ સત્તા સુધી પહોંચવામાં સફળ રહી.આ ચૂંટણી ભાજપ માટે લિટમસ ટેસ્ટ સમાન હતી.

આ સમયે ત્રણેય આંદોલનકારી નેતા પણ સક્રિય હતા. આ પૈકીના એક એવા ગુજરાતની ગાંધીનગર દક્ષિણ સીટના ધારાસભ્ય અને ઓબીસી સમાજના નેતા અલ્પેશ ઠાકોરે જાહેરમાં સ્વિકાર કર્યો છે કે એ સમયે શંકરસિંહ વાઘેલા નડ્યા ન હોત તો કોંગ્રેસે સરકાર બનાવી હોત. ભલે એ સમયે કોંગ્રેસ સામે બાપુનો બળવો કામ ના આવ્યો પણ મત તોડવાનું કારણ બન્યા હતા. જેના કારણે ભાજપને સીધો ફાયદો થયો હતો.

Zee 24 Kalakના પોડકાસ્ટ બ્લેક કોફીમાં આ મામલે અલ્પેશ ઠાકોરે આ બાબતે સીધો સ્વીકાર કર્યો છે કે કોંગ્રેસ પાસે 2017માં સરકાર બનાવવાની તક હતી પણ શંકરસિંહ નડ્યા અને એ તક કોંગ્રેસે ગુમાવી નહીં તો 30 વર્ષનું વનવાસનું મહેણું એ સમયે ભાગ્યું હોત. અલ્પેશ ઠાકોર જે બોલ્યા છે એ શબ્દશ નીચે છે.

બાપુને કોંગ્રેસે શું શું નથી આપ્યું!

બાપુને અત્યાર સુધી જે કાંઈ મળ્યું છે એ કોંગ્રેસ પાર્ટીએ જ આપ્યું છે, પ્રદેશ પ્રમુખ બનાવ્યા, કેન્દ્રમાં મિનિસ્ટર બનાવ્યા, વિરોધ પક્ષના નેતા બનાવ્યા. એ જ બાપુએ 2017માં સરકાર ના બનવા દીધી. આટલા મોટા વડીલ, આટલા મોટા કદ્દાવર નેતા રહ્યા હોય. મને યાદ છે કે તેઓ મુખ્યમંત્રી બન્યા ત્યારે પણ કોંગ્રેસના ટેકાથી બન્યા હતા. એ જ કોંગ્રેસને એમને 2017માં ખતમ કરી નાખી તો બાપુએ કારણ આપવું જોઈએ કે કયા કારણથી તમે એ કર્યું હતું. આજે બાપુ લડાઈની વાત કરે છે. તો બાપુ મારા બાપા જેવા છે વડીલ છે મને રાજનીતિમાં એ જ લાવેલા. બાપુને નજીકથી ઓળખું છું બાપુ માટે એ પરિવાર માટે મને પ્રેમ પણ છે. પણ બાપુ જેવા મોટા નેતા ભૂલ કરે. તો અમને અમે તો હજુ યુવાન છીએ.

ભલે ને ભાજપ અમારી ટિકિટ કાપી નાખે. તમે શું કામ ચિંતા કરો. તમારો કોંગ્રેસ પ્રવેશ કરાવી દો. મને ખબર છે હું જવાબદારી પૂર્વક કહું. બાપુનો કોંગ્રેસ પ્રવેશ નહીં થઈ શકે. બાપુને આવું હવે કોઈ નહીં કહે. ૨૦૧૭માં તમે કોંગ્રેસને કેમ પાડી દીધી. શું કારણ હતું? શું અન્યાય થયો હતો. તમને તો બધું આપ્યું હતું. ITC ના ચેરમેન બનાવ્યા હારી ગયા છતાં કેબિનેટ રેન્ક આપી હતી. તમને આટલું બધું અમને તો કઈ મળ્યું નથી. આ બધા બૂમ બરાડા પાડે છે. શું લઈ લીધું કોંગ્રેસ જોડેથી અમે શું લઈ લીધું. એક એવા સંઘર્ષના સમયે જ્યારે કોંગ્રેસ મૃતપાય હતી અમે એને એ સમયે જીવતી કરી હતી.