રાજસ્થાનથી ગુજરાત સુધી MD ડ્રગ્સની હેરાફેરી, 15.61 લાખના મુદ્દામાલ સાથે ડ્રગ્સ ડીલરની ધરપકડ

દર્શલ રાવલ, અમદાવાદ : રાજસ્થાનથી દ્વારકા સપ્લાય થઈ રહેલા એમડી ડ્રગ્સના જથ્થા સાથે એક ડ્રગ્સ ડીલરની ધરપકડ કરવામાં આવી છે. આરોપી પાસેથી પોલીસે 10.17 લાખના ડ્રગ્સ સહિત 15.61 લાખનો મુદ્દામાલ કબ્જે કર્યો છે. સાથે જ ડ્રગ્સ મોકલનાર અને રિસિવર વિરુધ્ધ પણ ગુનો નોંધી પોલીસે ફરાર બન્ને આરોપીની શોધખોળ શરૂ કરી છે.

રાજસ્થાનથી દ્વારકા સપ્લાય કરતો હતો એમડી ડ્રગ્સ

અમદાવાદ ઝોન 7 LCBની કસ્ટડીમાં રહેલા આરોપીનું નામ કાદર ઉર્ફે ઘુવડ મિયાણા છે. જે મુળ જામનગરનો વતની છે. આરોપી કાદર રાજસ્થાનથી એમડી ડ્રગ્સ લાવી દ્વારકામાં સપ્લાય કરતો હતો. જે અંગેની માહિતી પોલીસ ને મળતા પોલીસે વિસાલા પાસેથી આરોપીની ધરપકડ કરી. જેની પાસેથી 339 ગ્રામ એમડી ડ્રગ્સ, મોબાઈલ અને ગાડી સહિત કુલ 15.61 લાખનો મુદ્દામાલ કબ્જે કર્યો છે. મહત્વનું છે કે, આરોપી છેલ્લા 6 મહિનાથી ડ્રગ્સ હેરાફેરી કરતો હોવાનુ સામે આવ્યું છે.

તપાસમાં ચોંકાવનારો ખુલાસા

ડ્રગ્સની ડિલિવરી કરનાર આરોપી કાદરની તપાસમાં સામે આવ્યું કે, ડ્રગ્સનો જથ્થો રાજસ્થાનના બાસવાડાથી ફૈઝલખાન નામના ડ્રગ્સ ડીલર પાસેથી મેળવ્યો હતો અને તે જથ્થો દ્વારકાના ફકીરા ઉર્ફે છાપી નામના સપ્લાયરને આપવાનો હતો. જે બાદ ફકીરા આ ડ્રગ્સના જથ્થાનું છુટક વેચાણ અલગ અલગ વિસ્તારોમાં કરતો હોવાનુ સામે આવ્યું છે. જેથી પોલીસે ડ્રગ્સનો જથ્થો કબ્જે કરી તેની સાથે સંકળાયેલા તમામ લોકો સામે કાર્યવાહી કરવાની તજવીજ શરૂ કરી છે.

10થી વધુ વખત લાવી સપ્લાય કર્યું ડ્રગ્સ

ડ્રગ્સ સાથે પકડાયેલા કાદરની પુછપરછમાં સામે આવ્યું કે, આરોપી છેલ્લા 6 મહિનામાં 10થી વધુ વખત રાજસ્થાનથી ડ્રગ્સ લાવી સપ્લાય કરી ચુક્યો છે. ઉપરાંત દરેક ટ્રીપ માટે તેને 25 હજાર રૂપિયા મળતા હોવાનું પણ સામે આવ્યું છે. મહત્વનું છે કે, દ્વારકાનો ફરાર આરોપી ફકીરા કાદરનો મિત્ર છે અને તેના કહેવાથી તે ડ્રગ્સ લાવ્યો હતો. જેથી ડ્રગ્સના નેટવર્ક અંગે વેજલપુર પોલીસ મથકે ગુનો નોંધી પોલીસે વધુ તપાસ શરૂ કરી છે. ત્યારે ડ્રગ્સ રેકેટના તાર ક્યાં અને કોના સુધી પહોંચે છે. તે તપાસ બાદ જ સામે આવશે.