અમદાવાદમાં પવિત્ર સંબંધોને લાંછન લગાડતી ઘટના, પિતા સમાન મોટા બાપુજીએ 12 વર્ષની માસૂમને પીંખી નાખી

ઉદય રંજન, અમદાવાદ : અમદાવાદના રામોલ વિસ્તારમાં બનેલી આ ઘટના સાંભળીને કોઈપણ સંસ્કારી માણસનું માથું શરમથી ઝૂકી જશે. સંબંધોમાં પિતા સમાન ગણાતા મોટા બાપુજી જ જ્યારે હેવાન બની જાય, ત્યારે દીકરીઓએ સુરક્ષિત રહેવું ક્યાં? રામોલ પોલીસના સકંજામાં આવેલો આ શખ્સ સંબંધોનો હત્યારો છે. પત્ની સાથે અણબનાવ હોવાથી નાના ભાઈએ તેને ઘરમાં આશરો આપ્યો હતો, પણ આ નરાધમે આશરો આપનાર ભાઈની જ 12 વર્ષની માસૂમ દીકરીને મોબાઈલમાં પોર્ન વીડિયો બતાવી પોતાની હવસની શિકાર બનાવી નાખી.

પવિત્ર સંબંધોને લાંછન લગાડતો કિસ્સો

માસૂમ બાળકી આ હેવાનિયતથી એટલી ડરી ગઈ હતી કે તે કશું બોલી શકી નહીં, પરંતુ જ્યારે નરાધમે ફરીથી શારીરિક અડપલાં કર્યા, ત્યારે માસૂમે હિંમત ભેગી કરી માતાની મહિલા મિત્રને આપવીતી કહી અને પાપનો ઘડો ફૂટ્યો. પરિવારે પૂછપરછ કરતા જ આ પાપી પોતાનો મોબાઈલ બંધ કરી અમદાવાદથી ભાગી છૂટ્યો હતો. રામોલ પોલીસે ગુનાની ગંભીરતા જોઈને તાત્કાલિક લોકેશન ટ્રેસ કર્યું અને ગણતરીના કલાકોમાં આ નરાધમને અંકલેશ્વરમાં તેના મિત્રના ઘરેથી દબોચી લીધો.

પોલીસે ગુનો નોંધી તપાસ શરૂ કરી

રામોલ પોલીસે હાલ પોક્સો અને દુષ્કર્મની ગંભીર કલમો હેઠળ ગુનો નોંધી, FSL અને સાયન્ટિફિક પુરાવાઓ એકત્ર કરવાની કાર્યવાહી શરૂ કરી છે. એક તરફ સરકાર દીકરીઓની સુરક્ષાના દાવા કરે છે, પણ જ્યારે ઘરની અંદર જ આવા વરુઓ છુપાયેલા હોય ત્યારે વાલીઓએ સાવચેતી રાખવાની જરૂર છે. હવે જોવાનું એ રહેશે કે આ નરાધમને કોર્ટ ક્યારે કડકમાં કડક સજા ફટકારે છે.

દરેક વાલીઓ માટે લાલબત્તી સમાન કિસ્સો

સમાજને હચમચાવી દેતી આ ઘટના માત્ર એક ગુનો નથી, પરંતુ દરેક વાલીઓ માટે આંખ ઉઘાડનારો કિસ્સો અને લાલબત્તી સમાન છે. જ્યારે લોહીના સંબંધો જ હેવાન બનીને ઘરની અંદર છુપાયેલા હોય, ત્યારે પોતાના બાળકોને સંબંધીઓ સાથે પણ એકલા મૂકતા પહેલાં સો વાર વિચારવાનો સમય આવી ગયો છે.

રામોલ પોલીસે નરાધમ મોટા બાપુજીને જેલના સળિયા પાછળ તો ધકેલી દીધો છે, પણ હવે જનતાની એક જ માંગ છે કે આ માસૂમ બાળકીને ઝડપી ન્યાય મળે અને આ નરાધમને એવી કડક સજા થાય કે ફરી કોઈ આવા પવિત્ર સંબંધોને લજવવાની હિંમત ન કરી શકે.