Gujarat Breaking News Live: ગુજરાતમાં આજે ક્યાં શું બની રહ્યું છે, દેશ-વિદેશમાંથી કયા મોટા સમાચાર સામે આવી રહ્યા છે, સરકારના મહત્વના નિર્ણયો, રાજકીય નિવેદનો, જનતાને અસર કરતા મુદ્દાઓ, અકસ્માતો, હવામાનના સમાચાર અને અન્ય મહત્વપૂર્ણ ઘટનાઓ તેમજ લેટેસ્ટ સમાચાર અને બ્રેકિંગ અપડેટ્સ માટે Zee 24 Kalak Gujarati સાથે જોડાયેલા રહો...
સ્મિત મચ્છરની આરોગ્યની સુખાકારી માટે મુખ્યમંત્રી ભૂપેન્દ્ર પટેલ આરતી કરશે. મુખ્યમંત્રી ભૂપેન્દ્ર પટેલ શ્રી ભાવેશ્વર મંદિર ખાતે આરતીમાં જોડાઇ સ્મિત મચ્છરની આરોગ્યની સુખાકારી માટે પ્રાર્થના કરશે.
નાયબ મુખ્યમંત્રી હર્ષ સંઘવી વિદેશ પ્રવાસે જશે. 18 ઓક્ટોમ્બરથી ડેપ્યુટી CM વિદેશ જાપાનના પ્રવાસે જવાના છે. વાઇબ્રન્ટ ગુજરાત ગ્લોબલ સમિટ અંતર્ગત જાપાનની મુલાકાત લેવાના છે, તો રાજ્ય સરકારના અધિકારીઓનું ડેલીગેશન પણ તેમની સાથે વિદેશ યાત્રામાં જોડાશે.
બનાસકાંઠાના દાંતીવાડાના પાંથાવાડાની રેફરલ હોસ્પિટલમાં 65 વર્ષીય વૃદ્ધે શરીર પર પેટ્રોલ છાંટી આગ લગાવી આત્મહત્યાનો પ્રયાસ કર્યો. વૃદ્ધ સળગતી હાલતમાં રેફરલ હોસ્પિટલમાં પહોંચ્યા. હોસ્પિટલ સ્ટાફે તાત્કાલિક આગ બુઝાવી બચાવ કામગીરી હાથ ધરી હતી. વૃદ્ધ દેવેન્દ્ર બાબુલાલ વાણિયાને વધુ સારવાર માટે પાલનપુર ખસેડાયા છે. હોસ્પિટલના CCTV કેમેરામાં સમગ્ર ઘટનાના દ્રશ્યો કેદ થયા છે. હોસ્પિટલ સુપ્રિટેન્ડેન્ટ ડૉ. હિમાંશુ ગઢવીએ પાંથાવાડા પોલીસને જાણ કરતા પોલીસની ટીમે ઘટનાસ્થળે પહોંચી તપાસ હાથ ધરી છે.
અમેરિકામાં ગેરકાયદેસર રીતે પ્રવેશવાના પ્રયાસ દરમિયાન ઇથોપિયામાં અપહરણનો ભોગ બનેલા મહેસાણાના ૩ યુવક-યુવતી પરત ફરતા પરિવારોએ રાહત અનુભવી છે. આ લોકો વડસ્મા પોતાના ઘરે પરત ફરતા પરિવારમાં ખુશીનો માહોલ છવાયો હતો. બંનેએ પરિવાર સાથે માતાજી અને મંદિરે દર્શન કર્યા હતા. ત્રણેય અમેરિકા કાયદેસર ગયા હતા કે ગેરકાયદે તે અંગે તેમજ સમગ્ર મામલે એજન્ટની ભૂમિકા અને બેદરકારી હતી કે નહીં તે અંગે વધુ તપાસ જરૂરી બની છે.
ગુજરાતમાં વધુ એક IAS અધિકારી સામે કાર્યવાહી કરવામાં આવી છે. IAS ગૌરવ દહિયાને ફરજિયાત નિવૃત્ત કરવામાં આવ્યા છે. વહીવટી તંત્રમાં ગેરરિતી અને વિવાદો બાદ સરકારે આ કડક પગલાં લીધા છે. તેમને અધિક વિકાસ કમિશનર પદેથી ફરજિયાત નિવૃત્ત કરવામાં આવ્યા છે.
ચૂંટણી પંચ દ્વારા નવા તથા વર્તમાન મતદારોની નોંધણી માટે ખાસ ઝુંબેશ હાથ ધરાશે. 18થી 19 વર્ષના યુવા મતદારો મતદારયાદીમાં નામ નોંધાવી શકશે. ઓક્ટોબર અને નવેમ્બરમાં 4 રવિવારે મતદાન મથકો પર વિશેષ કેમ્પ યોજાશે. આગામી 11, 18, 25 ઓક્ટોબર અને 1 નવેમ્બરે કેમ્પનું ખાસ આયોજન કરાયું છે. સવારે 10થી સાંજે 5 વાગ્યા સુધી BLO દ્વારા ફોર્મ સ્વીકારવામાં આવશે. મતદારયાદીમાં નવું નામ નોંધાવવા માટે માત્ર ફોર્મ નંબર-6 ભરવાનું રહેશે. સર પ્રક્રિયામાં બાકાત થયેલા મતદારો પણ નોંધણી કરાવી શકશે.
નવસારી ખાણ ખનીજ વિભાગે અંબિકા નદીમાં ગેરકાયદેસર રીતે યાંત્રિક બાજ દ્વારા રેતી ખનન કરનારા ખનન માફીઓ સામે કાર્યવાહી કરી છે. જિલ્લામાં પ્રથમવાર ડ્રોન સર્વેલન્સ દ્વારા નદીમાં થતા ગેરકાયદેસર રેતી ખનનને ભૂસ્તર વિભાગે ઝડપી પાડ્યું છે. ભૂસ્તર વિભાગે 2 યાંત્રિક બાજ અને 11 ટ્રકો મળીને કુલ 2.25 કરોડ રૂપિયાનો મુદ્દામાલ જપ્ત કર્યો છે. સમગ્ર મુદ્દે ધોલાઈ મરીન પોલીસ મથકે ગુજરાત મિનરલ નિયમો 2017 હેઠળ ગુનો નોંધાવવામાં આવ્યો છે.
વડોદરાના કરજણ પાસે નેશનલ હાઇવે પર આવેલ CNG પંપ પર કારમાં બ્લાસ્ટની ઘટના સામે આવી છે. CNG કારમાં એકાએક બ્લાસ્ટ થતા અફરા તફરી સર્જાઈ હતી. કારમાં ગેસ પુરાવતા સમયે બનાવ બન્યો હોવાનું સામે આવ્યું છે, બ્લાસ્ટના કારણે કારને મોટું નુકસાન થયું છ. જો કે, સદનસીબે કોઈ જાનહાની થઈ નથી.
પૂર્વ IAS કે. રાજેશ સામે મોટી કાર્યવાહી કરવામાં આવી છે. ગુજરાત સરકારે કે રાજેશને ફરજિયાત નિવૃત્તનો આદેશ આપ્યો છે. સામાન્ય વહીવટ વિભાગ દ્વારા આ આદેશ કરવામાં આવ્યો છે. કે. રાજેશની ભ્રષ્ટાચાર કેસમાં ધરપકડ થઈ હતી.
