Gujarat News Live: જસદણમાં સગીરા પર સામૂહિક દુષ્કર્મ, તાપીમાં આખરે દીપડો પાંજરે પુરાયો, ભાજપ બક્ષીપંચ મોરચાના કારોબારી સભ્યોની જાહેરાત

જસદણના આટકોટ પંથકની 17 વર્ષીય સગીરાના અપહરણ બાદ સામૂહિક દુષ્કર્મની ઘટના સામે આવી છે. જસદણ તાલુકાના એક ગામની સીમમાંથી સગીરાને બાઈક પર બેસાડી લઈ ગયાનો આક્ષેપ લગાવવામાં આવ્યો છે. બાબરા પંથકના અવાવરુ સ્થળે બે શખ્સોએ વારાફરતી દુષ્કર્મ આચર્યું હતું. સગીરાએ પરિવારને જણાવતા સમગ્ર મામલો સામે આવ્યો હતો. સગીરાના કાકાએ આટકોટ પોલીસ મથકમાં ફરિયાદ નોંધાવી છે. મનસુખ નાનકા ભુરીયા અને રાકેશ દેવકા સામે ગુનો નોંધાયો છે. 
 

તાપી જિલ્લાના કટાસવાણ ગામના પટેલ ફળિયામાં આખરે દીપડો પાંજરે પુરાયો છે. દિપેશ ગામીતના ઘર પાસે દોઢથી બે વર્ષનો દીપડો પાંજરે પુરાયો છે. દીપડો પાંજરે કેદ થતાં સ્થાનિકોને રાહત મળી છે. દીપડાની અવરજવરને લઈ ગ્રામ્ય વિસ્તારોમાં વન્યજીવ સુરક્ષાનો મુદ્દો ફરી ચર્ચામાં આવ્યો છે.

પ્રદેશ ભાજપ દ્વારા બક્ષીપંચ મોરચાના કારોબારી સભ્યોની જાહેરાત કરવામાં આવી છે. આ યાદીમાં કુલ 25 કારોબારી સભ્યોનો સમાવેશ થાય છે. ગુજરાત ભાજપ પ્રદેશ પ્રમુખ જગદીશ વિશ્વકર્મા અને પ્રદેશ મોવડી મંડળ સાથે ચર્ચા-વિચારણા કર્યા બાદ આ લિસ્ટ જાહેર કરવામાં આવ્યું છે.  

સૌરાષ્ટ્રમાં ફરી એકવાર ધરા ધ્રૂજી છે. તલાલાથી 11 કિલોમીટર દૂર ઉત્તર ઉત્તર-પૂર્વ દિશામાં ભૂકંપનો આંચકો અનુભવાયો હતો. જમીનથી 7.8 કિલોમીટરની ઊંડાઈએ ભૂકંપનું કેન્દ્રબિંદુ નોંધાયું હતું. સૌરાષ્ટ્રના તલાલા નજીક બપોરે 2:02 મિનિટે 2.9ની તીવ્રતાનો ભૂકંપનો આંચકો નોંધાયો હતો.