ગાંધીનગર મનપાના નવા ‘સરતાજ’ કોણ? મેયર રેસમાં રૂપસિંહ ઠાકોરનું નામ મોખરે!

Gandhinagar Mayor : ગાંધીનગર મનપાના રાજકારણથી આ ક્ષણના સૌથી મોટા સમાચાર સામે આવ્યા છે! દિવાળી પૂર્વે મનપાને નવા કપ્તાન મળી જશે. મેયરની રેસમાં રૂપસિંહ ઠાકોરનું નામ હવે ફાઇનલ હોવાનું સૂત્રો જણાવી રહ્યાં છે. મનપાના નવા હોદ્દેદારોની જાહેરાત પહેલાં જ રૂપસિંહ ઠાકોરના નામે બાજી મારી હોવાના સંકેતો મળતાં જ ગાંધીનગરના રાજકારણમાં ગરમાવો આવી ગયો છે. 

લાંબા સમયથી આ નામો અંગે અટકળો ચાલી રહી હતી. ગાંધીનગરમાં ઠાકોર સમાજનું પ્રભુત્વ છે એટલે મેયર પદનો કળશ પણ બક્ષીપંચના માથે ઢોળાયો હોવાની ચર્ચા સૂત્રો કરી રહ્યાં છે.ગાંધીનગર મનપાના નવા મેયર સહિત ડેપ્યુટી મેયર, સ્ટેન્ડિંગ કમિટીના ચેરમેન અને પક્ષના નેતા જેવા મહત્વના હોદ્દાઓ માટે સંભવિત નામો સામે આવ્યા છે.

મેયર તરીકે રૂપસિંહ ઠાકોરનું નામ લગભગ નિશ્ચિત

મળતી માહિતી મુજબ, ગાંધીનગર મનપાના મેયર તરીકે રૂપસિંહ ઠાકોરનું નામ લગભગ નિશ્ચિત માનવામાં આવી રહ્યું છે. જોકે, સત્તાવાર જાહેરાતની હવે કરવામાં આવશે. બીજી તરફ, ડેપ્યુટી મેયર પદ માટે હેમા ભટ્ટ અને અંજના મહેતાનાં નામ ચર્ચામાં છે. આ બંનેમાંથી કોઈ એકને ડેપ્યુટી મેયરની જવાબદારી સોંપવામાં આવે તેવી શક્યતા છે. ગાંધીનગરમાં ડેપ્યૂટી મેયર પદે મહિલાને બેસાડી ભાજપ સંતુલન જાળવવાની કોશિષ કરી રહ્યું છે. 

કોણ બનશે સ્ટેન્ડિંગ કમિટીના ચેરમેન?

સ્ટેન્ડિંગ કમિટીના ચેરમેન પદને લઈને પણ ચર્ચાઓ તેજ બની છે. આ પદ માટે મહેન્દ્ર દાસનું નામ ચર્ચાઈ રહ્યું છે. જોકે, ગૌરાંગ પટેલને પણ ફરીથી મહત્વની જવાબદારી સોંપવામાં આવે તેવી શક્યતા વ્યક્ત કરવામાં આવી રહી છે.

આ ઉપરાંત, ગાંધીનગર મનપામાં પક્ષના નેતા તરીકે અનિલસિંહ વાઘેલાનું નામ લગભગ નિશ્ચિત માનવામાં આવી રહ્યું છે. જ્યારે દંડક પદ માટે મિત્તલ ખીમસૂરિયાનું નામ ચર્ચામાં છે.

આવતીકાલે થશે સત્તાવાર જાહેરાત

ગાંધીનગર મહાનગરપાલિકામાં નવા હોદ્દેદારોની નિમણૂકને લઈને રાજકીય હલચલ તેજ બની છે. હવે તમામની નજર પક્ષના મોવડીમંડળની સત્તાવાર જાહેરાત પર ટકેલી છે. કયા નામ પર આખરી મહોર લાગે છે તે આવતીકાલે એટલે કે 3 નવેમ્બરના રોજ યોજાનારી સામાન્ય સભામાં નક્કી થશે.

ભાજપને 44માંથી મળી હતી 38 બેઠક

ઉલ્લેખનીય છે કે, ઓક્ટોબર 2026માં યોજાયેલી ગાંધીનગર મહાનગરપાલિકાની સામાન્ય ચૂંટણીમાં ભારતીય જનતા પાર્ટીએ 44માંથી 38 બેઠકો જીતીને ફરીથી સત્તા મેળવી હતી.

ચૂંટણી પરિણામની વિગતવાર માહિતી

• કુલ બેઠકો: 44 (11 વોર્ડ)
• કુલ મતદાન: 59.25%
• ભાજપ (BJP): 38 બેઠકો 
• કોંગ્રેસ (Congress): 5 બેઠકો
• અપક્ષ: 1 બેઠક
• આમ આદમી પાર્ટી (AAP): 0 બેઠક